ازاي تبقي "لامؤاخذة" هاكر ؟

سؤال كنت دايما بسأله لنفسي وانا صغير بعد ما اقرا خبر ان في هاكر عمل حاجة كبيرة برة او لما بشوف فيلم للهاكر او اي حاجة ليها علاقة بالمجال دا كنت دايما بسأل نفسي ازاي ابقي كدة ؟ ازاي اكون هاكر واعمل الحاجات اللي بيعملوها دي! وكنت اول واحد بسأله دايما هو جوجل بس للاسف مكنش بيطلع الحاجة اللي تدلني علي الطريق! وكنت لما اعمل سيرش بالenglish بلاقي 1000 طريقة امشي بيها! والعرب كانت كل مواضيعهم عن برنامج تحط فيه الايميل يجبلك الباسورد او برنامج تنزله "يهكرلك" علي الايميلات لواحدة ساعتها فعلا كنت بحس اننا متأخرين بسنين ضوئية عن الناس اللي برة دي! عشان كدة المقالة دي هتكون طريق ليك من واحد ميعرفش مين هو الهاكر دا اساسا ل "mr robot".

مين هو الهاكر؟

اول مرة اتقالت الكلمة دي كانت في الستينات زمان وكانت بتتقال للناس العباقرة في الكمبيوتر والتعامل معاه لانه زمان كان اللي عندهم الكمبيوترات هما الشركات وبس مكنش في حاجة اسمها PC او جهاز شخصي لكل واحد ومكانش في GUI (graphical user interface) يعني مكانش فيه زراير و ماوس واشكال وكل دا كانت كل حاجة عن طريق الكود والterminal وبس فطبعا كان اي حد بيتميز بالمجال دا بيكون فعلا عبقري.

ايه انواع الهاكرز؟

 اكيد معظمنا سمع عن انواع الهاكر وانهم 3 انواع واحد طيب والتاني شرير والتالت دا واقف في النص في الحقيقة الكلام دا مش صح او صح نسبيا! انواع الهاكرز هما 7 انواع مش بس 3 وهما:

• Script Kiddie : دا ميعتبرش هاكر اوي بس هو شخص كسول وبيشغل دماغة دا شخص ميعرفش اوي في الهاكينج هو كل اللي بيعمله انه بيستخدم برامج معينه زي (metasploit , LOIC) ويدخل علي اليوتيوب ويجيب كام كود ويقعد يلعب في البرامج وخلاص مبيفكرش يبتكر او يعمل حاجة هو بنفسه. (كتير من العرب اللي بيقولو علي نفسهم هاكر هما من النوع دا).

• White Hat : دول بقي الناس الطيبين في عالم الهاكر الشرير الوحش 😂 دول ناس كويسة خالص دول بقي اللي بيعملوا الanti-viruses و اللي ممكن تجيبهم يختبرولك الاختراق بتاع الsystem بتاعك عشان يشوفوا لو فيه ثغرات وكدة ومعظمهم بيكون معاهم درجة علمية كبيرة وشهادات في كدة. ومعروفين بأسم Ethical Hackers "الهاكرز الاخلاقيين"

•  Black Hat : دول بقي عم محمود المليجي في عالم الهاكينك دول الناس اللي بنسمع عنهم دايما في نشرات الاخبار انهم عملوا كذا وكذا دا معندوش مشكلة انه يدخل يسرقلة كام مليون من بنك او يسرق بيانات من اي شركة او يبوظ اجهزة حد اي عنصر تخريب هما دايسين فيه وخلاص. وبردو معروفين ب اسم crackers.

• Gray Hat : "مفيش حاجة دايما صح او دايما غلط" المبدأ دا بينطبق علي كل حاجة في حياتنا بما فيهم عالم الهاكرز الgray hat دول الناس اللي رقصت علي السلم اللي ممكن بليل يخترقلة موقع او اتنين مش عاجبينة وتاني يوم الصبح يعلمك ازاي تحمي نفسك من الهاكرز نوع بيعمل اللي هو عاوزة سواء صح او غلط.

• Green Hat : دول بقا اللي بيقولو عليهم "noobz" او مبتدئين لسه بيسموا الله في عالم الهاكينج وكدة بس مهتمين بالمجال فعلا وعاوزين يتعلموا هاكينج بجد مش مجرد اكواد يجبوها جاهزة وخلاص مهتمين يتعلموا فعلا حاجة ودول اللي بيتحولوا بعد كدة لواحد من التلاتة اللي فوق.

•  Red Hat : دول بقي ناس عجيبة كدة واوصافها غريبة دول عاملين زي الwhite hat كدة في موضوع انهم بيتصدوا للblack hats بس مبيحبوش موضوع اختبار الاختراق دا دول لما يجيوا يعملوا اختبار اختراق بدل ما يبلغك بيه لا يقوم راميلك فيه فيروس ولا حاجة واتعامل انت بقي بيعلمك بس بالطريقة الصعبة يعني.
   

• Blue Hat : شايف او نوع اتكلمنا عنهم دول ؟ الscript kiddies دول لما يحبوا يتعلموا هاكينج بقي ويدخلوا المجال دا بيكونوا blue hat بيبدأو يتعلموا فعلا الهاكينج بجد بس مبيكنش عندهم الشغف في انهم يتعلموا بيتعلموا عشان يعملوا حاجةمعينة وخلاص. 

هما دول انواع الهاكرز اللي موجودين في الكوكب دا واللي دايما بتسمع عنهم في الاخبار والافلاو وكدة.

ازاي تكون هاكر ؟ 

من البداية لازم تكون عارف ان الموضوع مش حاجة سهلة هتتعلمها في يومين تلاتة الموضوع متعب ومحتاج وقت وصبر وتمشي واحدة واحدة لحد ما توصل ان شاء الله ودي الحاجات اللي هتمشي عليها:

1. اتعلم برمجة
   البرمجة هي  أ ب في مجال الcomputer science عموما واي هاكر في الدنيا لازم يكون قوي جدا  في البرمجة ومبتكر مش ماشي وخلاص وكبداية لو انت متعرفش اي حاجة في البرمجة فا انصحك انك تبدأ تتعلم بلغة بايثون - python لاسباب كتير لانها سهلة كبداية ومن اقوي اللغات ومعظم برامج المستخدمة في الهاكينج معمولة بيه.
   ممكن بردو تبدأ بالجافا هي من اقوي اللغات اللي موجودة حاليا وسهلة نسبيا ومعمول بيها برامج كتير جدا ومستخدمة في كلي حاجة سواء ويب او موبايل او ديسكتوب.
   لو عاوز تدوس برمجة فعلا وتتعلم اساسيات  كلh حاجة فعلا وتتعامل مع الرام بنفسك وكل حاجة بنفسك فا انت محتاج تتعلم c/c++ هما لغات قوية جدا بس واخدة قوتها دي من انها بتخليك تعمل حاجات كتير low-level. ولو عاوز تعرف عن البرمجة اكتر شوف المقال دا. 
   
   وكمان محتاج تتعلم برمجة للويب عشان لما تتعامل مع المواقع وكدة لازم تكون فاهم هتتعامل معاها ازاي في لغات للويب كتير واقويا جدا بس انصحك تتعلم php او perl و جافا سكريبت ومحتاج طبعا تتعلم mysql.
2. اتعلم لينكس
   الهاكر ملوش نظام تشغيل معين يمشي عليه اللي بيعرف يعمل حاجة هيعملها من ويندوز ومن لينكس ومن ماك او اي نظام تشغيل يتعامل معاه بس معظمنا متعاملش غير مع ويندوز وبس وميعرفش وكتير مننا ميعرفش اذا كان فيه اي operating system تانية اصلا وبعدين مش عيب تكون هاكر وبتستخدم OS زي ويندوز ومعتبرك عيل صغير وقافلك كل حاجة غير ان اللينكس تعاملك معاه هيخليك تعرف تتعامل مع السيرفرات لان كل السيرفرات شغالة بلينكس ولازم تتعلم command-line يعني تتعلم ازاي تتعامل مع الكمبيوتر بتاعك عن طريق الكتابة مش GUI وزراير ورسومات وكدة لان معظم السيرفرات مفيهاش اي GUI
   
   ولازم تتعلم تتعامل مع الحاجات الopen source وان اي برنامج تكون شايف الكود بتاعة وتشارك فيه وتعدل عليه وتشارك في كل الحاجات دي عشان تبقي بادئ صح وتستفيد وتفيد غيرك.
   
   المقال اللي جاي هيكون عن اللينكس والcommand-line تابعوة عشان تعرف ازاي تبدأ تنزل لينكس وتتعامل معاه.
3. اتعلم ويب
   اكيد كلنا بندخل علي نت ونقلب في مواقع ونشوف وكل تعاملنا مع  النت دلوقتي بس عمرك سألت نفسك المواقع دي اتعملت ازاي ؟ وعلي طول بنسمع عن الهاكر الل اخترع موقع كذا وكذا وطبيعي لو اتعلمت ازاي تعمل وتحمي هتعرف ازاي تعمل هاك لان فعشان كدة لازم تتعلم ويب لازم تتعلم html,css دول مش لغات برمجة دول اسمهم markup language لغات متخصصة انها مسؤلة عن الشكل بتاع الموقع والالوان والمقاسات وايه يتحط فين وكل الحاجات دي
   
   وطبعا بردو محتاج تتعلم java script دي المسئولة عن الحركة في الموقع وحاجات تانية كتير كدة وطبعا محتاج تتعلم php دي لغة برمجة للويب وتتعلم شوية من asp.net دي بردو لغة برمجة للويب تبع مايكروسوفت ومحتاج تتعلم mysql دي اللي هي database كل المواقع بتستخدم database عشان الداتا اللي بيحفظوها عندهم عشان كدة محتاج تتعلمها.
4. اتعلم شبكات
   العالم حاليا عبارة عن شبكة كبيرة كل حاجة شبكة لما بتفتح نت بتدخل في شبكة لما بتبعت ملفات لصاحبك بتعمل شبكة ما بينكوا كل حاجة شبكة لازم تتعلم ايه هي الشبكة ايه بدايتها يعني ايه بروتوكول يعني ايه بورت محتاج تعرف كل حاجة عن الشبكات. مثلا هتعمل هاك ازاي علي شبكة واي فاي من غير ما تكون عارف الواي فاي شغال ازاي ؟ هتعمل هاك ازاي علي جهاز تاني من غير ما تكون فاهم  الارتباط اللي ما بينكوا ؟ كل الحاجات دي محتاج تتعلمها هتلاقيها في الكورس بتاع CCNA دور علي اي كورس ليه في كتب كتير وفيديوهات كتير موجودين في اي حتة
5.  اتعلم انجليزي
   مهمة مهمة مهمة يمكن دي اهم حاجة في الخمس حاجات اللي انا قولتها لازم تتعلم انجليزي احسن الكورسات اللي هتلاقيها في اي مجال هتكون انجلش احسن الكتب هتكون انجلش لو في ثغرات جديدة نزلت هتنزل كل تفاصيلها بالانجليزي معظم الحاجات هتكون بالانجليزي كل تعاملك في عالم التكنولوجيا هيكون بالانجليزي فا دي حاجة مهمة جدا  
   

دلوقتي انا قولتلك الطريق اللي هتمشي عليه عشان تكون هاكر طيب وبعدين ؟ وبعد ما تعمل الحاجات دي ؟ انت دلوقتي لما هتعمل الحاجات دي هيبقي اسمك developer مش hacker طيب محتاج تعمل ايه بعدها ؟

• تكتب بأيدك برنامج Open-Source وتنزلوا علي النت وتخلي الناس تشارك فيه وتعدل فيه
• تشارك في برامج open-source ناس تانية كتباها ومنزلاها وتعدل فيها وتحط النسخة المعدلة بتاعتك انت وتنشرها 
• تنشر معلومات امنية مفيدة للناس وتساعدهم 
• اتعامل مع برامج زي wireshark و metasploit و ettercap دي برامج ممكن تسهل عليك حاجات كتير في الهاكينج
• تدخل مسابقات كتير في المجال دا وحاول تشارك في انك تدور علي ثغرات في البرامج والمواقع لانهم بيدوا مكافئات عن اللي يلاقي عندهم ثغرات ويبلغهم
  

دول كمان شوية نصايح ليك - عشان تكون هاكر لازم تفكر زي هاكر لازم تظبط الmindset بتاعك عشان تكون هاكر

• مفيش نظام امن - اي نظام في الكوكب دا معرض للاختراق الفرق بين قوة نظام ونظام تاني هي المدة اللي بتتاخد عشان النظام دا يتعمل عليه هاك
• العنصر البشري هو اضعف ضلع في اي نظام في العالم 
• الهندسة الاجتماعية -social engineering-  لا تقل اهمية عن الهاكينج بالكمبيوتر
• دماغك هي اقوي سلاح معاك مش دايما هتستخدم الكمبيوتر عشان تعمل عمليات هاكينج انت ممكن تعمل هاك علي سيستم كامل بمجرد محادثة مع حد 
• اتفرج علي افلام خيال علمي كتير لانها هتعلي مخيلتك ومخيلتك مهمة جدا كا هاكر 
• احضر اي ايفينت ليه علاقة بالسيكيورتي والهاكينج 
• اتكلم مع الناس كتير في مجال التكنولوجيا عشان تعرف دماغهم واصلة لفين وتقدر تدخلهم من انهي طريق 
• مش هتتعلم من غير ما تغلط ومش هتغلط من غير ما تجرب خللي عندك دي قاعدة مهم جدا في اي مجال تمشي فيها في حياتك 
• بالله عليك ما تسمي نفسك الهاكر العظيم و شيطان الهاكر وساحر الظلام والكلام دا انت اكبر من كدة 
• مفيش هاكر بيقول علي نفسه هاكر ممكن لو الموضوع اتفتح يتكلم معاك فيه ويفهمك انه اشتغل بس عمرة ما هيعرفك حدودة ايه 
• طور من نفسك دايما فكر نفسك انت لسه موصلتش للاخر لان مفيش اخر وكل هاكر فيه "اهكر" منه :D 
• جوجل هوصديقك الصدوق اللي متقدرش تستغني عنه 

ملخص بقي للطريق اللي المفروض تمشي عليه عشان توصل تكون هاكر
-اتعرف علي اللينكس ونزل توزيعة لينكس
-اتعامل مع كل المشاكل اللي هتواجهك مع اللينكس
-ابدأ اتعلم برمجة باي لغة من اللي قلناها فوق
-اعمل برنامج قوي باللغة اللي اتعلمتها
-اتعلم ازاي تحمي البرنامج دا
-اتعلم الويب development واعمل موقع كامل من اوله لاخرة بنفسك وارفعة علي اي موقع free hosting واتعامل معاه بنفسك وشوف الcpanel عاملة ازاي وازاي تتعامل معاها
-اتعلم شبكات ابدأ ب ccna
-اتعلم command-line في اللينكس وازاي تمشي فيها


كدة يا عم انا ابقي خلصت زمتي معاك وعرفتك الطريق اللي بيه تكون هاكر افتكر دايما ان اللي هتعملة هيترد فيك زية فا حاول متعملش حاجة وحشة ولا تاخد الموضوع للترويش علي صحابك والجو دا اتعلم عشان تفيد مش عشان تدمر