عائلة "فسافيس الانترنت"

مين هما عائلة فسافيس الانترنت؟!!!   

 عائلة فسافيس الانترنت أو زى ما بيقولوا عليهم عائلة ال" Malware " هم عبارة عن البرمجيات الخبيثة وكلمة Malware هى اختصار لكلمة Malicious Software  ومعناها برضو البرامج الماكرة ، ودى عبارة عن برامج معينة بيتم وضعها بطريقة الاكراه فى جهاز شخص معين علشان تؤدى وظيفة معين ممكن تكون الوظيفة دى تخريب او تجسس عن بعد وهكذا..... من الاخر كده هنتكلم عن انواع الفيروسات😂

طيب مين هما أفراد العائلة دى؟

بص يا سيدى العائلة دى بتتكون من 4 افراد وكل واحد فيهم ليه وظيفة معينة فى التخريب ، عندنا أول واحد فى العائلة وده اسمه " Virus " ويعتبر الاخ الاكبر فيهم ، وياجى من بعده اخوه " Worm " وده الاخ المتوسط فى العائلة دى ، ومن بعديهم عندنا واحد اسمه " Trojan " ، واللى من بعد " Trojan " ده فى كتكوتة صغيرة اسمها ال" BotNet " ودى اخر العنقود زى ما بيقولوا😂

 وتعال احكيلك قصة كل واحد فيهم وازاى بيشتغل وايه الاضرار اللى ممكن يعملها بجهازك!!!

ونبدأ بالاخ الكبير " Virus " ، عمنا ال" Virus " ده تقدر تقول عليه صريح جدا ، هو أول ما بينزل على الأجهزة بيبدأ يخرب فيها وحدة وحدة ، يعنى مثلا يبدأ يخرب بالبرامج وتلاحظ الموضوع ده لما تلاقى البرامج اللى عندك على الجهاز بدأت انها تهنج ومتشتغلش واحد وراء التانى لحد ما جهازك يوصل لحالة من البطىء الشديد ويعلق معاك جامد!!! طيب ازاى " Virus " ده بيشتغل ؟

بص مبدئياً كده " Virus " ده بيحتاج منك مساعدة علشان يبدأ يشوف شغله ويبدأ يخرب فى الجهاز ، هتقولى ازاى؟ هقولك انك لازم انت اللى تضغط على ملف ال " Virus " ده وتديلوه " Access " لجهازك هيبدأ فى اللحظة دى يوريك المواهب اللى عنده شوية شوية ، وفى الغالب لما انت تساعده وتخليه يشتغل على جهازك بيبدأ هو تلقائيا ينشر نفسه جوه جهازك انت بس ، يعنى مثلا ينشر نفسه جوه ملفات النظام أو جوه الفولدرات الخاصة بيك انت ، وقليل جداً لما تلاقى " Virus " ده قعد ينشر نفسه سواء على شبكة الكمبيوتر المرتبطة ببعضيها على نفس شبكة الانترنت أو على الانترنت نفسه ، وطبعاً من السهل جداً وده الغالب يعنى انك تعرف اذا كان موجود عندك على الجهاز " Virus " ولا لأ ؛ علشان ببساطة كل شغله خبط ولزق يعنى مهمته واضحة هو جاى علشان يخرب الاجهزة وبس
وهى  دى قصة حياة ال "Virus " باختصار شديد

طيب خلونا نشوف اخوه الاصغر منه واللى اسمه " Worm " 

Worm ده بيعتبر أهدى من أخوه Virus  بشوية وغالبا مش بيحتاج مساعدتك علشان يشتغل ، هو اصلا بينشر نفسه بنفسه سواء فى جهازك ككل أو فى الاجهزة المرتبطة مع بعض على نفس شبكة الانترنت ، بس الحاجة الحلوة اللى عند " Worm " ده انه مش بيخرب الاجهزة ، كل شغله انه بيخرب " File " معين  هو متبرمج انه يخرب الملف ده ، وبعد ما يخرب الملف ده تلقائياً بتلاقيه بيبعت نفسه لكل اجهزة الكمبيوتر اللى حواليك الموجودة على نفس شبكة النت ، أو مثلا تلاقيه بيبعت نفسه فى ايميلات لكل الContacts الموجودة عنك علشان يعمل عندهم نفس الحركة اللى عملها فى جهازك ويبدأ يخربلهم ملفات معينة وبعديها برضو يبدأ ينشر نفسه تلقائياً على الاجهزة التانية وهكذا ، يعنى من الاخر كده تحس انه حشرى أوى وبيحب الاختلاط يعنى اجتماعى فشخ😂 وعلشان اوضحلك اكتر ايه الWorm ده خش شوف المقالة دى Worm Virus

نيجى بقى للاخ التالت فى العائلة دى واللى اسمه " Trojan "

اكيد كلنا سمعنا عن حاجة اسمها Trojan واللى هو ترجمة لكلمة " حصان طروادة" طب بيعمل ايه ده اللى اسمه " Trojan " ؟!! الTrojan ده هو النوع التالت من انواع الفيروسات ككل و بيمثل الشخص الماكر جدا فى العائلة دى ودايما بيحب انه يقلد شخصيات كتيرة أوى ويتقمص فى أدوار مختلفة علشان يخدعك وطبعا عادة لما الTrojan ده بيوصل لجهازك مش بيكشف عن نفسه زى ما قلنا ، لا طبعا هتلاقيه موجود على هيئة صورة مكتوب عليها قط يشرب الماء وتحتيها " سبحان الله " او يغريك ويقولك انه عبارة عن فديو بعنوان " سمكة تونة تفترس أسد فى صحراء الربع الخالى " وتحت الفديو مكتوب برضو " سبحان الله " طبعا للتوضيح اكتر الحاجات دى كلها بتكون ملغمة!! يعنى ايه ملغمة؟ يعنى بيكون الTrojan ده مدموج فى صورة او فديو علشان ميتكشفش خالص ويتعرف انه فيروس وجى علشان يخرب هو كمان ، والTrojan ده عامل زى اخوه  الكبير Virus بالظبط يعنى لازم انت اللى تضغط عليه وتشغله علشان يشوف شغله ، واول ما تشغله بيبدأ يوريك مهارته يا برنس ، وأغلب الاحيان أنه هيفتح باب خلفى " Backdoor " لصاحبه اللى بعته ليك او بمعنى اصح اللى انشأه وهنشرح فى مقالة تانية ان شاء الله ايه هو الBackdoor وازاى بيتم عمله ، طبعا اخونا الTrojan ده ممكن انه يقعد بجهازك بقمة الأدب والاحترام ويبدأ يخزن كل حاجة انت بتكتبها على جهازك ويبعتها لصاحبه ، أو انه يورى صاحبه ايه اللى انت بتكتبه بالظبط على الكيبورد ، أو يعمل الاتنين مع بعض " يفتح  باب خلفى وفى نفس الوقت بيسجل اللى انت بتكتبوه ويبعتوا لصاحبه " يعنى لو عندك Trojan على الجهاز فانت بتكون متراقب!!!!

وده يا شبح حياة الTrojan الخبيث ، فخلى بالك بقى

واخيرنا اختهم الصغيرة كتكوتة العيلة اللى اسمها " BotNet " 

الBotnet دى زيها زى اخواتها Virus و Trojan لازم برضو علشان تشتغل وتوريكم قد ايه هي موهوبة وشاطرة لازم تساعدها وطبعا أول ما تشتغل مش هتعمل حاجة فى جهازك خالص!!!!
بتكلم بجد والله ، الBotNet دى هتقعد فى جهازك ولا كأنها موجودة اصلا ، مش بقولك دى كتكوتة العيلة اللذيذة ، كل اللى بتعمله انها بتبعت رسالة لصاحبها اللى بعتها ليك علشان يطمن عليها ، بس!!! 

لكن خليك عارف ان صاحبها اللى بعتها ليك بيكون برضو بعتها لاجهزة تانية كتيرة أوى على النت وكلهم بيكونوا بنفس طيبة واخلاق الBotNet الموجودة على جهازك ونفس القصة كل واحدة من البوت نت دى على كل جهاز بتبعت رسالة لصاحبها علشان تطمن صاحبها عنها

طبعا انتوا برضو متشوقين انكم تعرفوا ايه الوظيفة الحقيقية للBotNet دى وبعدين طالما هى مش بتعمل حاجة اومال ايه لازمتها وليه اصلا هى موجودة؟!!!
 طيب خلينا ندخل فى شغل الاكشن شوية واقولكم انه فى توقيت معين فى زمن معين وبساعة معينة بياجى صاحب البوت نت دى كلها وبيبعتلهم رسالة معينة بيقولهم فيها يا حبايب قلبى اعملوا " كذا " وحط تحت "كذا" دى 100 خط ، ايه بقى اللى ممكن تمثله كلمة " كذا " دى؟؟؟

فى أغلب الاحيان بتكون عبارة عن حاجة خطيرة جداً اسمها " DDOS Attack "  والكلمة دى اختصار لجملة

 Distributed Denial of Service ومعناها "هجوم الحرمان من الخدمة"  واللى اسمه DDOS Attack ده هو المسؤل عن تعطيل السيرفرات وسقوط المواقع والالعاب الانلاين واغلب الشركات الكبيرة وطبعاً المصالح كلها بتقف  طول ما الAttack ده شغال ، لحد ما يشوفوا حاجة توقف الهجوم ده  ، أو صاحب الBotNet يبعتلهم رسالة ويقولهم كفاية يا حبيباتى ، وبيرجعوا برضو بقمة الادب والاحترام بالاجهزة الموجودين عليها ، وطبعا فعليا بتكون كل الBotNet دى الموجودة على الاجهزة سواء جهازك أو الاجهزة التانية هى اللى عملت الهجوم ده على الموقع أو على السيرفر المعين! يعنى جهازك بيكون شارك فى جزء من عملية اسقاط الموقع وانت مش واخد بالك.
بس دى كانت قصة عائلة "فسافيس الانترنت" والاضرار اللى ممكن يعملوها بجهازك ، باقى لينا جزء توضيحى هام جدا الا وهو ازاى بيتم عمل هجوم الDDOS Attack وايه الفرق بينه وبين الDOS Attack وازاى نقدر ننتبه ليه ، وازاى نقدر نوقفه....استنونا فى المقال الجاى!!!